حاسة بالوحدة ...
هون ....
هـ
ـو
ن
"بقلبي "
بس قلبي مو بمطرحو ....بلمس باصابعي
ما بحس بنبض
بيوجعني بس
ليش كل الذكريات الحلوة صارت مُرة هيك
ليش صارت صورة شارعنا تبكيني
وريحة بيتنا
تقتلني
وليش بس فكر بغرفتي
وسريري
وتيابي
بدوخ ....وبتدور الدنيي فيني
ليش صاروا اصحابي بس اسماء
وجيراني وجوه مألوفة
وسما بلادي بعيدة
وارضها قاسية
ليش صارت الرجعه على الشام حلم
وممنوع قول اشتقت
لازم قول الحمد لله
ليش
مافيني احسد الي بقيوا هنيك
وكل ما بتنفس وبقول
آآآآآهـ
الف صوت بيصرخوا عليَ
بس
ليش بعد الشام بقلبي حلوة ودافية
وحنونة
وبقلوبهم صارت
مصيبة
والبعد عنها غنيمة
ليش البلاد يلي سمعت ضحكاتنا
وضمت خطواتنا
تنفسنا هواها....وتربينا انو نحبها
صارت فجأة بهالسواد
ليش صرت خاف على اخواتي
ورفقاتي
ونام واصحى وانا عم بدعي
يارب لا تفجعني بحدا منن
يارب ما تضرني
بعيلتي
وببلدي
وبالناس يلي كانو ولساتن اهلي
ليش صار كل الحكي هنن ونحنا
وليش صارت الوقفة على حاجز بسورية
اصعب من الوقفة على حاجز لاسرائيل
ليش صارت ريحة الدم بالطرقات
اقوى من الياسمين
والكل غربااا
ومشردين
ليش بحبك يا شام
ومو قادرة غير
قلك بأعلى صوت
لك ايه انا هون
بس روحي
هنيك
معلقة بكل زاوية ...وطريق
مخباية بين التراب والحجار
وطايرة فوق الشجر
تهمسلك مع كل نهار جديد
بحبك
وتعترفلك كل ليلة بتمر
اني كتير اشتقتلك
ليست هناك تعليقات:
إرسال تعليق
اجعل من حرفك....جناح ...وحلق في السماء ...